សាទរខួបទី៦២ ទិវាបុណ្យឯករាជ្យជាតិ

បទពាក្យ ៨

ថ្ងៃប្រាំបួន វិច្ឆិកា ថ្ងៃបុណ្យជាតិ

ញាតិព្រោងព្រាត ចូលរួម យ៉ាងកុះករ

ខួបហុកពីរ រីករាយ និងអបអរ

ថ្ងៃបវរ  សុខសាន្ត ជូនប្រជា។

ក្រោមមេឃខៀវ ជំនោរ ពពកផាត់

នាំរសាត់ រសាយ ជ័យទិវា

មហាជន មន្រ្តី  ជួបជុំគ្នា

មិត្តមីងមា ញញឹម សែនសប្បាយ។

ឮសម្លេង សូរសៀង ក្រុមត្រែទ័ព

ផ្លុំយ៉ាងជាប់ រន្ទឺ ឮសព្វសាយ

ពង្សាវតា ចម្រៀង    ខ្មែរបរិយាយ

ជនទាំងឡាយ ចងចាំ ជាប់ចិន្តា។

ព៌ណប៉េងប៉ោង ចម្រុះ ក្រហមស

ក្រងលម្អ    មានទាំង កម្រងផ្កា

បក្សាព្រាប  ឈ្មោលញី ក្នុងហត្ថា

ប៉ងប្រាថ្នា សុំសុខ សាន្តសួស្តី។

ព្រះមហា ក្សត្រយាង   អុជទៀនជ័យ

ថ្ងៃប្រពៃ ឧត្តម នាំសេរី

ចូលមានដល់ ប្រជា ទាំងប្រុសស្រី

ផ្តល់រស្មី ចាំងចែង ភ្លឺពណ្ណរាយ។

ក្រោមសម្លេង ពីរោះ សូរសំនៀង

រងំសៀង វង់ភ័ក្រ្ត ស្រស់ពព្រាយ

សំណុំផ្តុំ  ប៉េងប៉ោង  សត្វព្រាបលាយ

ចាប់ពង្រាយ បង្ហោះ លើវេហា។

ក្រោមជំនោរ ខ្យល់បក់ ពីខាងជើង

ទៀនជ័យភ្លើង ភ្លឺជះ  រន្ទាលផ្កា

ប៉ោងប៉េងហោះ ត្រដែត នាំអក្ខរា

ដែលបានចារ ខ្លឹមសារ ជ័យមង្គល។

០៩ វិច្ឆិកា ២០១៥

IMG_0286

Advertisements

Posted on ខែវិច្ឆិកា 9, 2015, in កំណាព្យ. Bookmark the permalink. បាន​បិទ​ការ​បញ្ចេញ​មតិ នៅ សាទរខួបទី៦២ ទិវាបុណ្យឯករាជ្យជាតិ.

ការ​បញ្ចេញ​មតិ​ត្រូវ​បាន​បិទ។

%d bloggers like this: